Nasayaaten ti kasasaad ti mangisursuro a mapapati a biktima iti gunshot wound idiay Barangay Capangdanan, Bantay.
Ti biktima ket agtawen iti uppat a pulo ket uppat, balo nga agnaed iti nasao a lugar.
Nakaawat ti Bantay Municipal Police Station ti pakaammo manipod Northside Doctors Hospital a naipaagas iti ayanda ti biktima a mapapati a nagsagaba iti gunshot wound isu a nagrespondeda.
Segun ti biktima, bayat ti pannaturogna iti kuartona kaduana ti anakna a lalaki nga agtawen iti sangapulo ket dua idi nakanggeg iti panagpaputok iti paltog.
Naamirisna laengen a natamaan isuna isu nga inayabanna ti maysa nga anakna a lalaki nga agtawen iti sangapulo ket walo tapno ipan isuna iti ospital.
Nagsagaba ti single gunshot wound ti biktima a simrek iti akin-kannigid a kidayna ken simmarot iti agong, pingping ken akin-kannigid a takyagna.
Iti baet ti nasagabana a dunor ket nasayaat ti kasasaad ti biktima ken agtaltalinaed a na-confine iti ospital.
