Imbilin ti Department of the Interior and Local Government (DILG) ti mandatory evacuation dagiti residente kadagiti lugar a nabigbig a high risk iti layos ken landslide gapu iti pangtudona nga epekto ti Severe Tropical Storm Leon.
Iti memorandum, nabilin amin a Local Government Units iti nainget nga ipatungpal ti forced evacuation protocols kadagiti lugar a nabigbig a nangato ti risgo iti layos, landslide, ken dadduma pay a related hazards.
Nairuar iti memorandum kasaruno ti bilin ni Defense Secretary Gilberto Teodoro Jr. nga agserserbi a chairman iti National Disaster Risk Reduction and Management Council (NDRRMC) para iti napaspas nga implementasyon ti forced ken mandatory evacuation.
Dagiti nabilin a mangipatungpal ti forced evacuation protocols ket iti Region 1, 2, 5 ken Cordillera Administrative Region ken dagiti hepe iti Philippine National Police (PNP) ken Bureau of Fire Protection (BFP).
Pinasingkedan ni Office of Civil Defense administrator Ariel Nepomuceno a ti bilin ket nairuar kagiddan ti panangisayangkat ti national government iti tignayda a tulongan dagiti naapektaran ti Severe Tropical Storm Kristine.
Segun ken ni Nepomuceno, masapul nga itultuloy iti panagbalin a proactive kangrunaan iti sitwasyon idiay Bicol ta adda dagiti ili ken siudad nga agtaltaltalined a nalayos ket gagemda iti zero casualties iti event of disasters isu nga allukoyenda iti publiko a sumurot kadagiti protocol.
Iti agdama, nairekord ti NDRRMC iti 116 a fatalities gapu iti epekto ti Bagyo Kristine.
