Impakaammo ti Malakanyang a saan a makaapekto kadagiti mannalon ti Pax Silica project a maipatakder iti New Clark City, idiay Tarlac.
Segun ken ni Palace Press Officer Atty. Claire Castro, addan ti naituding a lugar a pakai-patakderan dagiti pasdek wenno imprastruktura iti nadakamat a lugar manipud idi 2019, kagiddan ti panagsagana para iti SEA games.
Pinasingkedan ni Castro nga umabot iti 3, 500 nga ektarya ti kabuklan a lawa ti maawagan a “buildable areas” no sadino mabalin nga ipatakder dagiti proyekto kas ti Pax Silica.
Innayon na nga adda nakailatang a nasurok-kumurang 6, 000 nga ektarya para iti open green spaces, forest reserves ken dagiti nakatuding a lugar para iti upland farming.
Ti panangilawlawag ti Malakanyang ket kasaruno ti panangipila ni Senador Imee Marcos ti resolusion tapno imbestigaran ti epekto iti pagilian ti Pax Silica agreement.
