Binilin ti Malakanyang dagiti amin nga ahensia ti gobierno, agraman dagiti government-owned and controlled corporation ken state universities and colleges a pagtalinaeden a simple ken napnuan iti kaes-eskan ti Paskua ken year-end celebrations-da.
Inallukoy pay ti Malakanyang dagiti local government unit a sumurot iti isu met laeng a panawagan kas pannakikaysa kadagiti Pilipino a bumangbangon manipud iti napasaranda a didigra.
Nabilin pay dagiti mangidaulo ti ahensia a siguradwen ti nainget a panangsurot kadagiti amin a maipatpatungpal a linteg ken patakaran mainaig iti husto ken naannad a panagaramat iti pondo ti gobierno.
Idi napan a tawen, nagpanawagan ti presidente kadagiti kameng ken opisial ti gobierno a liklikanda ti nagarbo a panangrambak iti Paskua kas pannakikaysa kadagiti biktima iti nagsasaruno a bagyo.
