Binalakadan ti Malakanyang ti publiko a saan a matuokan iti resulta ti imbestigasion ti Independent Commission for Infrastructure ta adda proseso a masursurot kontra kadagiti maim-imbestigaran a karaman iti flood control scam.
Segun ken ni Palace Press Officer Atty. Claire Castro, saan a nasken a darasen ti imbestigasion ta adda prosesona malaksid iti kayat ni Presidente Ferdinand Marcos Jr nga agbalin a natibker ti kaso kontra kadagiti napabasul a nagtakaw iti kuarta dagiti umili.
Na-freeze dagiti asset dagiti napabasul a nagtakaw iti pondo ti pagilian ken agtultuloy a mangal-ala iti ebidensia ti ICI isu a saan a kasapulan ti agdardaras ta kasapulan ti due process.
Innayon ni Castro a nasken a mailawlawag kadagiti matuokan ti proseso ken saan a short cut a makita a dagus iti pagbaludan dagiti adda pagbiddutanna.
