Inallukoy ti Malakanyang ni Batangas 1st District Rep. Leandro Leviste a makitaripnong ken ni Pres. Ferdinand Marcos Jr. tapno ibutaktak iti amin nga impormasyon mainaig iti maanomalya a flood control projects kalpasan iti mapapati a panggep a pasuksokan isuna ti maysa a Department of Public Works and Highways wenno DPWH district engineer.
Segun ken ni Palace Press Officer Usec. Claire Castro, dakkel a tulong ti impormasyon ni Leviste tapno maibutaktak iti dakdakkel pay a nagan ken kontratista a posible nga adda iti likodan ti korapsyon.
Kinuna ni Castro saan laeng a ti district engineer iti rumbeng a madusa nudiketdi dagiti adda ti likodan ti operasyon, uray dagiti bassit iti nagbalin nga akemda iti nasao nga aramid.
Iti agdama ket ur-urayen ti Malakanyang iti ited nga impormasyon ni Leviste tapno marugian ti naun-uneg nga imbestigasyon tapno maparmek dagiti sindikato nga agkuar-kuarta kadagiti proyekto a rumbeng a para kadagiti umili.
