Kinontra ni Baguio City Mayor Benjamin Magalong a nagikkat kas mayor iti siudad kalpasan a nadutokan kas special adviser iti Independent Commission for Infrastructure a nabilin a mangimbestigar iti anomalya kadagiti flood control project.
Segun ken ni Magalong, saan a maapektaran ti panagbalinna nga imbestigador para iti ICI iti panagtakemna kas mayor.
Itay bigat ket inlawlawag met ni Presidente Ferdinand Marcos Jr. no apay a napilina kas special adviser ti komision ni Magalong.
Segun ken ni Marcos, ilaksidna dagiti pulitiko iti komision, ken binigbigna ti panagbalin nga imbestigador idin ni Magalong nangruna iti akemna iti Mamasapano incident idi 2015.
No apay met a saan a nangala ti presidente manipud iti Criminal Investigation and Detection Group ken National Bureau of Investigation nga agimbestigar, kinuna ti presidente a dagitoy nga ahensia ket adda iti salinong ti gobierno.
