Inlawlawag ita ni House Committee on Justice Chairperson ken Batangas Rep. Gerville “Jinky Bitrics” Luistro a saan a dumur-as ken saan a maipasa iti opisina ti House Speaker ti impeachment complaint no awan ti mangiyendorso a kongresista.
Palagip daytoy ni Luistro kadagiti pribado nga indibidual wenno grupo a mangipilpila iti impeachment complaint.
Dayta ket iti baet ti agsasaruno a reklamo ti impeachment a naipila kontra ken ni Presidente Ferdinand Marcos Jr.
Ti pay laeng impeachment complaint nga impila ti abogado a ni Atty. Andre de Jesus ken inyendorso ni Pusong Pinoy Partylist Rep. Jernie Jett Nisay ti naipasa iti House Speaker.
Immunan a pinasingkedan ni Luistro a tignayanda a dagus ti ania man nga impeachment a mai-refer iti komite tapno makita no daytoy ket ‘sufficient in form’ ti linaonna.
