Impaganetget ti Land Transportation Office nga adda legal a pagibasaran ti panangtiliw ken panang-impound kadagiti e-bike ken e-trike a dumaldalyasat kadagiti national highway mangrugi inton December 1, 2025 maibasar iti Implementing Rules and Regulations ti Electric Vehicle Industry Development Act.
Segun iti ahensia, maiparit kadagiti public highways dagiti light electric vehicles nga agdagsen iti 50 kg ken para iti pribado nga alikamen, ken nakasaganada a mangipatungpal iti registration babaen iti maysa nga Administrative Order a mairuar iti uneg ti makalawas.
Maballaagan pay dagiti light electric vehicles kadagiti secondary road sakbay ti naing-inget a tignay.
Kabayatanna, kinondenar ni Rep. Terry Ridon ti nasao a pagannurotan, ta kunana nga awan ti legal a pagibasaran iti impounding ken ti panangpalubos ti EVIDA Law kadagiti nasao a lugan a dumalyasat kadagiti national ken local road, nangruna kadagiti private use.
