Awan ti pammilin manipud iti Department of Transportation a mamuelta dagiti akin-kukua iti lugan a saan nga insigida a nakaala iti plakada.
Dayta ti inlawlawag ti Land Transportation Office kasaruno dagiti report nga adda ti P5,000 a mapapati a muelta para kadagiti akinkukua iti lugan a saan a makaala nga insigida a plakada ken agtultuloy nga agar-aramat iti improvised plates.
Segun iti LTO, nakapokus ita ti amin a kameng iti panangipatungpal kadagiti addang tapno masurot ti pammilin ni Presidente Ferdinand Marcos Jr a maited amin dagiti plaka iti uneg ti tallo a bulan, kalpasan a maikkat ti backlog idi June 30.
Al-allukoyen ti LTO dagiti akin-kukua iti lugan a dagus nga alaen ti original wenno replacement plates-da babaen iti online platform nga LTO Tracker wenno mapan iti opisina ti ahensia.
Binilin pay ti ahensia dagiti Regional ken District Offices a papigsaenda ti information drive iti panagiwaras iti plaka tapno maragpat ti ad-adu a vehicle owners, nangruna dagiti motorcycle rider.
