Impasigurado ti Land Transportation Office a tutukanda ti kaso ti driver ti dump truck a karaman iti aksidente idiay Luna, Isabela a nakatayan dagiti 3 a tao ken 8 ti nadunor.
Segun ken ni LTO Chief Assistant Secretary Markus Lacanilao, dusaenda ti drayber no mapaneknekanda a naglabsing daytoy iti linteg-trapiko maibasar iti resulta ti imbestigasion.
Immunan a nangiruar ti LTO Region 2 iti Show Cause Order kontra iti driver a napabasul iti reckless driving ken improper person to operate a motor vehicle.
Naikkan ti driver iti tallo nga aldaw sipud naawatna ti Show Cause Order nga ipasa ti palawagna no apay a saan a nasken a masuspenso wenno maikkatan iti driver’s license.
No saan a makaipasa, maibilang a panangiyaleng-aleng iti karbenganna a mangngegan iti biangna, ken madesisyonan ti kaso maibasar iti iggem ti ahensia nga ebidensia.
