Inallukoy ti Land Transportation and Franchising and Regulatory Board (LTFRB) dagiti driver dagiti pampubliko a lugan a saan nga ag-vlog wenno agaramid iti social media content bayat nga agmanmaneho.
Kagiddan dayta ket nangiruar ti ahensia ti memorandum a mangbilin kadagiti operator a palagipan dagiti driver a sumurot iti nasao a bilin tapno maliklikan iti aniaman a klase iti aksidente.
Karaman kadagiti maiparit ti panag-vlog, panagaramid iti content ken panagaramat iti social media bayat nga agbibiahe.
Mamuelta iti P5,000 ti siasinoman nga aglabsing iti memorandum apaman a maipatungpal dayta.
Gagem ti inisyatibo a salakniban dagiti pasahero ken dadduma pay nga agar-aramat iti kalsada ken tapno maliklikan dagiti driver ti panaglabsing iti Anti-Distracted Driving Act.
