Nakakustodian iti kapulisan ti lima a persons of interest iti panagdukot ken panangpapatay iti beauty pageant candidate a ni Geneva Lopez ken ti Israeli boyfriend na a ni Yitshak Cohen.
Segun ken ni Philippine National Police chief General Rommel Marbil, tallo manipud kadagiti lima ti naarestar gapu iti agduma a kaso, dua ti simmuko ken nangted iti testimonyada ken dua ti nakalibas pay laeng.
Innayon ni Marbil a tiliwen met laeng ti PNP dagiti dua a sabali pay kalpasan a makakalapda iti natibker nga ebidensya tapno makaipila iti kaso.
Maipalagip a nasarakan dagiti otoridad ti bangkay dagiti dua a tattao iti quarry site idiay Barangay Sta. Lucia, Capas, Tarlac, dua a lawas sipud napukaw idi June 21.
Madakdakamat pay iti report a dua kadagiti pito a persons of interest ket dati a pulis ket maysan ni Michael Angelo Guiang a nagserbi a middleman da Lopez ken Cohen para iti gatangenda a 20.5 nga ektarya a daga.
