Nagpanawagan ni House Speaker Faustino “Bojie” Dy III ken ni dati a Congressman Elizaldy Co nga agawiden iti Pilipinas ket sangwenna dagiti umili nga agkidkiddaw iti kinapudno.
Segun ken ni Dy, saan a makanay ti video ni Co manipud iti sabali a pagilian a nanginagananna kada Presidente Ferdinand Marcos Jr., dati a House Speaker Martin Romualdez ken dadduma pay nga opisial nga adda iti likudan ti 100-billion pesos nga insertions iti 2025 national budget ken panangkupit iti binilion a kickback.
Innayon ni Dy a nadagsen dagiti pammabasul ni Co isu a nasken laeng a sumango iti imbestigasion, agsapata, ken mangiruar iti ebidensia kadagiti otoridad kas ti Independent Commission for Infrastructure.
Impasigurado ti House Speaker a no nasken a maipaayan iti proteksion ni Co ket makikammayet laeng kadagiti maseknan nga ahensia para iti kinatalgedna a mangipaay iti testimonia.
