LGU- Caoayan, nagiwarasen ti cash subsidy para kadagiti tricycle driver ken kutsero a naapektaran ti enhanced community quarantine gapu ti COVID-19

VIGAN CITY – Rinugianen ti LGU – Caoayan iti panangidadaulo ni Mayor Germelina Goulart ti panangipaay ti cash subsidy kadagiti kalugaranna a naapektaran ti pagsapulanda gapu iti enhanced community quarantine.

Segun ken ni Goulart, ti programa a binukelda ket gagemma a matulongan dagiti tricycle driver a naawanan ti pagsapulan gapu ti naipatungpal a mass transportation ban.

Malaksid kadagiti tricycle, manamnama a matulungan iti nasao a programa dagiti kutsero nga agnaed idiay Caoayan.

Dagiti maseknan nga agiwaras kadagiti cash subsidy ket ti Department of Social Welfare and Development ken treasury office.

Ti tunggal benepisyaryo ket inaldaw a makaawat ti PHP 150 agingga a malpas iti naiyetnag nga enhanced community quarantine.

Kabayatanna, binilin ti mayor ti Municipal Agriculture Office a gumatang da ti bukel ti nateng nga iwaras da iti kada pagtaengan ta imulada tapnu addan to ti nakasagana a burasen ken kanen da nu kumaro pay iti krisis a mapaspasaran gapu iti nasao a sakit.