Manamnama a maipatakder ti maysa a large-scale “wean-to-finish” commercial piggery project idiay Barangay San Antonio, Sta. Cruz, Ilocos Sur.
Ti proyekto ket babaen iti panagbinnulig ti maysa a dakkel a kompania idiay Thailand ken ti Local Government Unit ti Sta. Cruz.
Iti pannaki-uman ti Bombo Radyo Vigan ken ni Vice Mayor Virgilio Valle, gagem ti addang masuplayan ti intero a Northern Luzon iti baboy ken malapdan ti panagkurang ti suplay kadagiti nadumaduma nga ili.
Addanto module iti nasao a piggery ket kada module, maipatakder iti 12 a pasdek.
Kada pasdek, makargaan iti 1,600 a baboy ken target a makargaan agingga iti 18,000 a baboy nga amin dagitoy ket maaramat para iti fattening idinto a maisarunonto met dagiti maaramat para iti breeding.
Para met iti biosecurity measure, adda alad ti pasdek isu a saan a makastrek dagiti gagangay laeng a tao.
Dagiti agtrab-trabaho iti nasao a piggery ket adda met mailatang a pagyananda.
