VIGAN CITY – Matamtaming idiay Ilocos Sur District Hospital- Narvacan ni Alfredo Ramos Jr nga agtawen ti lima pulo ket maysa a nadunor iti rupa na ta tinagbat ni Victor Cordero nga agtawen ti uppat a pulo ket pito idiay San Pablo, Narvacan idi parbangon ti January 1.
Tatta nga aldaw iti pannakaipila iti kaso kontra ken ni Cordero a kas pinasingkedan ni Police Captain Arcadio Viloria, hepe ti Narvacan municipal police station.
Kabayatanna, ma-CT scan pay ni Ramos tatta nga aldaw tapnu naan-anay a makita nu kasanu kakaro iti sinagaba na a dunor gapu iti panangtagbat kenkuana ni Cordero.
Mapapati a ti panangtagbat ni Cordero kenni Ramos ket wagas iti panangibales na iti mapapati a panangbagkong kenkuana ni Adonis a putot ti biktima.
Posible a madi iti nangipapanan ti suspek iti papan ti biktima ken ti putot na iti ayan da nga agiinom isu a tinagbat na ti biktima a nakatamaan iti rupa ken ulo na.
Pinasingkedan ni Viloria a kas iti napasamak idiay San Pedro, Narvacan, ti napasamak idiay San Pablo ket bunga met laeng iti nalabes a panaginom ti nasanger.
