Maysa nga aso ti natay ta pinaltugan ti lalaki a kinagatna iti siudad ti Candon.
Iti pannaki-uman ti Bombo Radyo Vigan ken ni Michaela Catacutan, nakangngegda ti putok ti paltog ken ariwawa ti aso iti karrubada isu a napanda pinadas a lapdan.
Binagaanda dagiti mangdangdangran iti aso a dakes ti ar-aramidenda ket nasaysayaat no ipanda iti veterinary office tapno maobserbaran iti uneg ti 14 nga aldaw.
Saanda a nagsardeng ket dinangran ken pinaltoganda latta ti aso.
Nupay kasta, nakipatangda iti barangay ngem awan iti dayta a gundaway ti kapitan aginga a nakaawatda met laeng ti tawag kenkuana a marurod ken babalawenna ida no apay a bumibiangda iti nakairuamanda nga aramiden kadagiti aso nga adda makagatna, ket inkalinteganna pay a kasta ti maar-aramid kadagiti sabali a barangay.
Naidatagdan iti kapulisan ti pasamak ket mangnamnama ni Catacutan a maited ti hustisia iti aso ken saanen a maulit pay ta adda linteg a mangdusa kadagiti mangdangran wenno mangpatay kadagiti dingwen.
