VIGAN CITY- Saanen a kasoan ni John Mark Tobia Peros nga agtawen iti dua pulo ket tallo, baro ngem adda live in partner na ti ama na a ni Juanito Torreno Peros nga agtawen iti lima pulo ket maysa, a nangpaltog kenkuana idi parbangon ti March 17 iti mismo pagtaengan da idiay Cabalangegan, Vigan City.
Segun ken ni Police Superintendent Dexter Paredes, hepe ti Vigan City police station, inbaga ti suspek kenkuana a tunggal makainom ken mabartek ti biktima ket agprobokar ken saan na nga ammo ti lublubongen na isu nga idi kinaryar ken dinissoan na ti live in partner na ket bimmallaet ti suspek.
Gapu ta nakaiggem ti kutsilyo idi daydi a kanito ti biktima, pinaltugan ti suspek isuna ket natamaan ti timid ken tengnged na.
Saan a pagbabawian ti suspek iti inaramid na ket inbaga na a nu saan na a pinaltugan, posible nga isu ti binagkong ken pinatay ti biktima.
Kabayatanna, saan pay met a narekober ti paltog a caliber 38 revolver nga inaramat ti suspek ta idi napan nagresponde dagiti pannakabagi ti linteg iti lugar ket awan iti nakita da a paltog iti uneg ti pagtaengan ti biktima ken suspek.
Inballaag met ni Paredes a nu makita da ti paltog ken nu maamuan da nu siasinu ti nangidulin, ket posible a makasoan pay, karaman ti suspek iti salinong ti agdama a maipatpatungpal a Comelec gun ban.
