Maipasango iti kaso nga slander by deed ti maysa a lalaki gapu iti panangibabain ken panangdangranna iti maysa a babai iti tiendaan idiay San Vicente, Ilocos Sur.
Ti nagreklamo ket maysa a babai, agtawen iti limapulo, agnaed iti Barangay Bulag, Bantay.
Ti met suspek ket lalaki nga agtawen iti uppat a pulo ket pito, agnaed iti Barangay Bantaoay, San Vicente.
Iti pannaki-uman ti Bombo Radyo Vigan ken ni PLT. Marvin Jordan Laroya, gumatgatang ti biktima iti prutas idi inasitgan ti suspek a nangsangat kenkuana mainaig iti bingayda kadagiti mangga a naapit idi kallabes.
Nagturong ti patangan ti biktima ken suspek iti riri agingga nga impak-ol ti suspek ti timba iti bukot ti biktima sakbay a nangpidot iti bato ken nangisawang kadagiti dakes a balikas kas ti panangpabasulna nga agtatakaw iti sangwanan dagiti tao iti tiendaan.
Ti insidente ket napasamak pay laeng idi Mayo 18, 2026 ken dimmalan nga immuna daytoy iti barangay ngem saan a naurnos isu a naireport iti kapulisan.
Maisagsagana itan dagiti dokumento para iti pannakaipila ti naan-anay a reklamo iti Office of the Provincial Prosecutor.
