VIGAN CITY– Makasoan ti panaglabsing iti Republic Act 9165 wennu Comprehensive Dangerous Drugs Act of 2002 ni Romel Garrino Padre nga agtawen iti 31 , baro ken agnaed idiay Tablac, Candon City gapu ti panagikot na iti pouch a naglaon iti medium sized transparent plastic sachet ti napagango a bulong ti marijuana nga adda payen ti sabong na.
Segun ken ni Police Superintendent Jugith Del Prado, hepe ti Candon City PNP, naipaagas idiay Candon City hospital ni Padre ta naaksidente ngem idi napan nagCR, imbes nga idiay CR ti lalaki ti pagderetsoan na, nasiputan dagiti otoridad a nangitaray kenkuana iti ospital a nagderetso iti CR ti babbai ken adda ti inyawat na a pouch ken ti kasinsin na a ni Wilmer Padre Ebojo nga agtawen iti 25, naasawaan ken agnaed idiay San Isidro, Candon City.
Idi pinalukatan dagiti pulis ti nasao a pouch, nakita dan iti maiparit nga agas isu a nakemmeg iti uneg ti ospital ti biktima ti aksidente a nagbalin a suspek ti panagikot ti maiparit nga agas karaman ti kasinsin na a nangawat iti pouch, uray nu ipatangken na a saan na nga ammo a marijuana ti nagyan ti nasao a banag.
Pinasingkedan met ni Del Prado a ni Padre ket saan a karaman iti listaan ti Candon City police kadagiti drug surrenderee iti lugar isu nga ibilang da isuna kas baro a drug personality.
