VIGAN CITY – Dati a susik iti rason ti pannagbat ti maysa a lalaki ti kabsatna idiay Sitio Namitlatan, Brgy. Poblacion, San Esteban idi rabii ti September 3, 2021.
Iti pannaki-uman ti Bombo Radyo Vigan ken PLt. Arnold Calzado iti San Esteban Police Station, adda iti naawatda a report nga adda pannagbat a napasamak iti nasao a lugar isu a nagrespondeda ket nabigbigda ti suspek a ni Edgar Vidal, agtawen ti limapulo ket dua, naasawaan ken mannalon idinto a ti biktima ti kabsatna a ni Eric nga agtawen ti limapulo, mannalon nga agpada nga agnaed ti nasao a lugar.
Segun ken ni Calzado, naririan ti suspek ti kabsatna bayat ti panaggi-inomda iti arak kaduana ti gagayyemna isu a nagsinnungbat dagiti dua gapu ti panangtagbat ti suspek iti ulo biktima babaen ti buneng.
Nupay kasta ket saan a nakaru iti sinagaba ti biktima ta insigida met laeng a nakaawid apaman a nataming iti Ilocos Sur District Hospital Narvacan.
Inlawlawag ni Calzado a babaen ti imbestigasyonda ket maipapan ti tawid ti rason iti saanda a pagkinnaawatan ta idi napalabas a bulan ket nagubalda manen iti mismo last night iti amada.
Nupay kasta ket nagpalagip ni Calzado kadagiti umili a liklikan iti aginom iti arak kasta payen a liklikan pay laeng iti panaggu-ummong gapu iti sursuroten a health protocols tapno malapdan iti panagwaras iti covid-19.
