Nakemmeg ti maysa a lalaki a nangbagkong iti padana a construction worker idiay Barangay Bucalag, Santa, Ilocos Sur.
Nabigbig ti suspek a ni Celso Ducaya Calso Sr., agtawen iti uppat a pulo ket pito, taga-Barangay Casiber.
Ti met biktima ket ni Mark Ancheta Quiral, agtawen iti sangapulo ket siam, taga-Barangay Rancho.
Iti pannaki-uman ti Bombo Radyo Vigan ken ni PLT. Ryan Jay Quiocho, agtutugaw iti Barangay Hall ti biktima ken dagiti kaduana idin ta limmabas ti suspek nga aglaaw-laaw gapu iti bartekna ket nakaisawang iti agkakadakes a balikas kadakuada.
Gapu dayta, sinurot ti biktima ti suspek ket nagdinnanogda ket bigla met a binagkong ti suspek ti biktima iti tyanna.
Naipaagas iti ospital ti biktima para iti pannakatamingna.
Naisuko kadagiti pannakabagi ti linteg babaen kadagiti barangay tanod ti balisong nga inaramat ti suspek.
