Kaso a murder iti sangwen ti lalaki a nangbagkong ken nangpatay ti kainomanna idiay Sitio Palikud, Barangay Sucoc, Narvacan Ilocos Sur.
Ti met suspek ket lalaki nga agtawen iti tallopulo ket siam, taga-Barangay Sucoc, iti nasao nga ili idinto a ti biktima ket lalaki nga agtawen iti tallopulo ket lima, agnaed idiay Barangay San Antonio, Narvacan.
Iti pannaki-uman ti Bombo Radyo Vigan ken ni Plt. Reynald Ramos iti Narvacan Municipal Police Station, naggapu iti bantay a nagkayo ti biktima idin dimmagas iti maysa a pasken a nakipasetan met laeng ti kabagyanna a suspek.
Segun ken ni Ramos, iti panagsasangoda a nagi-inom ket adda iti iretreto ti biktima iti suspek nga armenna wenno asawaenna ngem saan a nagustoan ti suspek iti panangipilit kenkuana ti biktima ta kabagyanna iti mairetreto kenkuana isu a nagkinnaritda ngem naanawa laeng dagiti kakaduada.
Nagawid ti suspek ket nangala iti kutsilyo nga insukibotna sa nagsubli iti paggi-inomanda, ngem idi immasideg ti biktima ket sinutilna manen ti suspek, isu metten iti panangasutna iti patadem nga imbagkongna iti tengnged ti biktima.
Naipan iti ospital ti biktima ngem naideklarar a dead-on-arrival idinto a ti suspek ket nakemmeg iti pagtaenganda iti naisayangkat a hot pursuit operation a nakaalaan payen iti patadem nga inaramatna iti krimen.
