Dead on arrival ti maysa a lalaki gapu ti pannakalmes na iti kabaybayan ti Brgy. Dadalaquiten Norte, Sinait, Ilocos Sur.
Ti biktima ket agtawen iti tallopulo ket walo, tricycle drayber, residente ti Barangay Sta. Cruz, Sinait.
Iti pannakiuman ti Bombo Radyo Vigan ken ni PCPT Bryan Romeo Lopez, napan nagpana ti biktima ken dagiti kakaduana iti kabaybayan idin ta kellaat a timmapog ti biktima iti kabaybayan.
Pinadas ti maysa a kadua ti biktima a tulongan isuna ngem saan na nga insigida a naasitgan gapu ta nauneg iti dayta a paset ti kabaybayan.
Kalpasan ti sumagmamano a minutos, naalaw ti biktima ken dagus daytoy a naipan iti igid ti baybay ngem napaot ti panangibiahe da gapu ta mapatta-patta a nasurok 250 meters ti kaadayo na manipud iti nakapasamakan ti insidente.
Dagus a naitaray ti biktima iti balay pagagasan ngem naideklarar a dead on arrival.
Naammuan a nakainom ti arak ti biktima idi napasamak ti insidente.
