Ituloy ti Sta. Catalina Police Station ti panangipilada iti kaso a grave threat kontra iti maysa a lalaki a nagipaturong iti iskupeta kadagiti 9 a lalaki nga agal-allawagi idiay Barangay Cabittaogan, Sta. Catalina.
Dagiti biktima ket agpapada nga agnaed iti siudad ti Vigan idinto a ti suspek ket agtawen iti duapulo ket lima, agnaed iti Barangay Cabittaogan.
Iti pannaki-uman ti Bombo Radyo Vigan ken ni PCPT. Medel Perinion, Officer-in-charge ti Sta. Catalina Police Station, immuna nga adda saan a nagkinnaawatan ti nakainom a suspek ken ti maysa kadagiti construction worker.
Nagtaray ti biktima gapu iti butengna idinto a nagawid ti suspek a napan nangala iti iskupeta.
Idi nagsubli ti suspek iti pagub-ubraan ti biktima, pinaturonganna amin dagiti agub-ubra iti iskupeta ken immunan a pinangtaanna ti biktima a bayadanna ti biagna.
Nakemmeg ti suspek ken maidalan met ti iskupeta nga inaramatna iti ballistic examination.
