Agtultuloy iti imbestigasyon dagiti otoridad iti panagpaputok iti paltog ken panagpaturong iti paltog ti maysa a negosyante ken kandidato para ti Sangguniang Bayan kadagiti dua a lallaki idiay Barangay Cosili East, Bangued, Abra itay alas sais iti rabii, April 23, 2025.
Segun ti Abra Police Provincial Office, dagiti biktima ket da Jenrick Barreras Baay, agtawen iti tallopulo ket lima, naasawaan, negosyante; ken Ezzell Ryan Barreras Abidan, agtawen iti tallopulo ket lima, naasawaan, cook nga agpada nga agnaed idiay Barangay Cosili East, Bangued, Abra; idinto a ti suspek ket ni Buc Roger Luna, addaan iti husto a tawen, negosyante nga agnaed idiay Barangay Dangdangla, Bangued, Abra.
Nakaawat iti tawag dagiti otoridad maipanggep iti panag-harrass iti grupo ti suspek kadagiti biktima isu a nagtignayda ngem apaman a nakasangpetda ket awanen dagiti suspek.
Naamoan a simmangpet ti grupo ti suspek iti sangwanan ti pagtaengan dagiti nagreklamo nga isun ti nagrugian ti komosyon ken simmaruno iti panagpaputok ti paltog ti suspek ken panagpaturongna iti paltog kadagiti biktima ket kalpasanna pimmanaw iti nasao a lugar.
Nagturong nga insigida ti alert team idiay Barangay Dangdangla, Bangued, Abra kangrunaan iti pagtaengan ti suspek ket nakitada a nakatakder iti sangawanan iti pagtaenganna.
Bayat iti pannakisarita ti Acting Chief of Police iti Bangued Municipal Police Station kenkuana ket maysa a miembro iti pamiliana iti nagprobokar ken napasamak iti komosyon.
Kas safety precaution ket napaayaban ni Buc Luna ken abogadona iti Bangued Police Station para iti imbestigasyon.
