Nakemmeg ti maysa a lalaki a nagprobokar ken naalaan iti mapapati a shabu idiay Barangay Nagcullooban, Sinait, Ilocos Sur.
Ti suspek ket agtawen iti limapulo ket innem maysa a construction worker, agnaed iti nasao a lugar.
Ti met nagreklamo ket ti uliteg ti suspek a ni Barangay Captain Eduard Inong Eugenio.
Dagus a nagresponde dagiti pannakabagi ti linteg ket nakitada ti suspek nga agprob-probokar a nakaiggem iti buneng ken nakita dagiti agkaiwara a sarming a nabnabtak.
Malaksid dayta, maysa pay a piraso ti small heat-sealed transparent sachet a naglaon iti mapapati a shabu ken nabtak a glass tube ti nakita iti datar.
Naala pay manipud iti bulsa ti suspek ti maysa a gramo ti mapapati a shabu nga aggatad iti P6,800 a naikabil iti 4 a small, heat-sealed plastic sachet ken nadumaduma a drug paraphernalia.
