VIGAN CITY – Natay ti maysa a lalaki a nagmaneho iti motorsiklo gapu ti pannakaidungparna iti trailer truck idiay Brgy. Bonifacio, Cabugao.
Nabigbig dagiti nagkalubbon iti motorsiklo a ni Monolito Rubianes, agtawen iti uppat a pulo, drayber ken ni Alejandro Altitche, agtawen iti duapulo ket dua, miembro ti Philippine Coast Guard, awan helmetna ken agpadada a taga-Brgy. Salomague.
Iti pannaki-uman ti Bombo Radyo Vigan ken ni PCapt. Franco Catalan ti Cabugao Municipal Police Station, agpapaabagatan ti motorsiklo idin ta nadungparda ti bimmallasiw iti kalsada a ni Rogelio Regalado Jr., agtawen iti uppat a pulo a taga-Bonifacio isu a saan a nakontrol ti drayber ti motorsiklona ket bimmangir iti linya a puon ti pannakaidungparda iti nakasinnabetda a trailer truck.
Gapu ti dayta, nakaro a dunor iti ulo ti sinagrap ti drayber ti motorsiklo a naipaagas iti ospital ngem naideklarar a dead on arrival idinto a ti kinalubbonna ken ti napilidanda ket agpapalaingen.
Kabayatanna, saan a naan-ano ti drayber ti trailer truck ani John Millet, agtawen iti innem a pulo ket dua a taga-Sitio Palali Brgy. Poblacion, Sablan, Benguet a nakakustodia itan kadagiti pannakabagi ti linteg tapno dumalan iti husto a proseso.
