Nadunor ti maysa a lalaki a nagmaneho iti kuliglig gapu iti pannakadungparna ti SUV iti national highway ti Barangay Ayudante, Candon City, Ilocos Sur kangrunaan iti intersection a mapan iti Heroes Bypass Road.
Ti SUV ket minaneho ti maysa a lalaki nga agtawen iti tallopulo ket uppat, inluganna dagiti dua a lalaki nga agpapada a taga-Barangay Olo-Olo, Santiago.
Ti met kuliglig ket minaneho ti lalaki nga agtawen iti innem a pulo ket pito, taga-Barangay Patpata 2nd, Candon City.
Agpapalaud ti SUV iti Heroes Bypass Road, idinto nga agdaldalyasat iti igid ti kalsada ti kuliglig nga agpa-amianan.
Idi magtengda ti nakapasamakan ti insidente, simrek ti SUV iti national highway babaen iti agpaabagatan a linya idin ta nadungpar ti kuliglig ti kannigid a paset ti SUV.
Gapu dayta, nadunor ti kannigid a tumeng ti drayber ti kuliglig idinto a saan a naan-ano dagiti naglugan iti SUV.
