Iggemen ti Nagbukel Police Station ti maysa a lalaki nga agik-ikot iti paltog idiay Barangay Balaweg, Nagbukel, Ilocos Sur.
Ti suspek ket agtawen iti tallopulo ket maysa nga agnaed iti nasao a lugar.
Iti pannaki-uman ti Bombo Radyo Vigan ken ni Police Captain Alberto Ramos Jr., dimmagas ti suspek iti maysa a birthday party ket napan kadagiti nagiinom sa ipakitana ti paltogna.
Gapu iti amak dagiti adda iti nasao a pasken iti posible a madi a mapasamak ket inagaw ti maysa kadakuada ti paltog, sa intawagda iti kapulisan a dagus a met a nagresponde iti lugar.
Nakataray ti suspek iti dayta a kanito, ket nangiwayat dagiti pannakabagi ti linteg iti hot pursuit operation, agingga itay bigat nga addan iti ikot ti kapitan ti barangay nga isu ti nangisuko.
Dagiti nakumpiskar ket pakairamanan ti maysa a unit ti homemade caliber 38 revolver nga adda pito a live ammunition na a naikarga iti brown nga sling bag a kukua ti suspek.
Sangwen ti suspek ti kaso a panaglabsing iti Republic Act 10591 wenno Comprehensive Firearms and Ammunition Act ken Omnibus Election Code.
