Datin nga aramid ti lalaki a nakemmeg iti entrapment operation idiay Barangay Calimugtong, Galimuyod, Ilocos Sur ti agilako kadagiti kayo a saanna a kukua.
Nabigbig ti suspek a ni Jerson Galutan Sabado, agtawen iti tallopulo ket lima, taga-Barangay Patac, Galimuyod.
Ti biktima ket ni Randy Balio-an Andaya, agtawen iti tallopulo ket uppat, taga-Barangay Calimugtong.
Iti pannaki-uman ti Bombo Radyo Vigan ken ni PLT. Arnel Valdez, nabayagen nga ar-aramiden ti suspek ti kastoy a modusna ngem ita laeng nga adda ti nangireklamo kenkuana.
Inikkan ti biktima ti suspek iti P13,000 a pakauna a bayad kadagiti sangapulo ket lima a mahogany tress ken sangapulo ket lima a Gmelina trees idin ta nagkiddaw manen iti P1,500 ket immanamong met ti biktima ngem inreportnan kadagiti pannakabagi ti linteg isu a naiawayat ti entrapment operation.
Bayat iti operasyon ket inawat ti suspek ti entrapment money a P1,500 a bayad iti transaksyon a puon ti dagus a pannakakemmegna.
Naala pay kenkuana ti maysa a limagasut a pisos a genuine money, sangaribo a boodle money, ken maysa a cellular phone.
