VIGAN CITY – Nakaro a dunor iti ulo iti sinagaba ni Joseph Galano Rendon nga agtawen iti tallo pulo ket lima, naasawaan, laborer ken agnaed idiay Baybayabas, Santiago idi naidungpar iti nagluganan na a motorsiklo iti poon iti niyog idiay Darapidap, Candon City idi alas tres singkwenta ti parbangon idi kalman, April 7.
Segun ken ni Police Major Rene Boy Lata, deputy chief of police ti Candon City PNP, mapapati a nakainom ti biktima idi napasamak iti aksidente ta naangot dagiti nagresponde a pulis a nasanger isuna.
Agpa-pa-daya a direksyon ti biktima a nakalugan iti motorsiklo idi mapapati a naawan iti kontrol iti manibela ta napartak iti panagpataray na ket nagderetso iti akin-kannigid a shoulder iti kalsada sa naidungpar iti poon iti niyog.
Naitaray nga insigida iti ospital ti biktima babaen kadagiti nagresponde a kameng ti Bureau of Fire Protection- Candon City ken kameng ti PNP Candon ngem naideklerar a dead on arrival.
