VIGAN CITY – Panaglabsing ti Republic Act 10591 wennu Comprehensive Firearms and Ammunitions Act iti sanguen ti maysa a lalaki idiay Barangay Bagani Campo, Candon City gapu iti panagikot na iti paltog.
Segun kenni Police Staff Sergeant Carl Marc Bumachi ti Candon City Police Station, idi nagpatrolya da idi parbangon idi kalman, adda ti nakita da a babai ken lalaki nga adda iti nasipnget ken awan unay matatao a paset ti Barangay Bagani Campo isu a sinitar da ida.
Gapu iti kigtot dagiti dua, inpangato ti lalaki ti pantalon na idinto a ti babai ket nakaparintumeng met isu nga inpagarup dagiti otoridad nga ag-o-oral sex dagiti dua.
Nabigbig ti lalaki a ni Mike Galicia nga agtawen ti dua pulo ket tallo a maysa a security guard ken agnaed idiay Tablac, Candon City idinto a ti babai ket taga- Cabarita, Sta. Lucia nga agtawen ti tallo pulo ket uppat.
Idi sinitar dagiti pulis ni Galicia, adda nakita da a magasin iti paltog iti compartment iti sango ti motor na isu a pinalukatan da ti box iti motor ket nakita da nga adda pay paltog na.
Inkalintegan ti suspek a ti paltog nga ikot na ket pangdepensa na laeng iti bagi na isu nga itugtugotna na nangruna no itulodna ti nobya na iti pagtaengan da idiay Sta. Lucia ngem saan latta a mabalin agsipud ta masapul nga adda ti lisensya ti maysa nga igam sakbay a mairuwar iti pagtaengan ken masapul nga adda pay ti lisensya ti maysa a tao tapnu mapalubusan nga agikot iti igam.
