VIGAN CITY – Imon iti makitkita dagiti otoridad a rason nu apay a binagkong ti lalaki nga agtawen iti tallo pulo ket uppat ti rusok na idiay Paratong, Sinait idi May 22, alas nuwebe kinse ti agsapa.
Segun ken ni Police Lieutenant Irwin Ancheta, hepe ti Sinait municipal police station, nagimonan ti biktima iti inpost ti asawa na iti internet a ladawan.
Ngem, sakbay iti dayta ket addan iti saan a nagkinnaawatan ti biktima ken ti asawa na nga adda idiay Singapore.
Maibasar iti imbestigasyon, adda iti uneg ti pagtaengan da ti biktima idi mapapati a binagkong na ti bagi na babaen iti kitchen knife ket naitaray idiay Corpuz Clinic and Hospital, Sinait ngem naiyalis idiay Mariano Marcos Memorial Hospital, Batac City, Ilocos Norte ket iti agdama, natalgeden iti kasasaad na.
