Inlawlawag ti Korte Suprema (SC) ti nagdumaan ti panangdisiplina kadagiti ubbing ken panangabuso iti ubing.
Iti ruling, agbalin laeng a panangabuso ti disiplina no adda nalawag a panggep a mangdangran iti dignidad ti ubing, bayat a ti physical discipline ket saan automatiko a maipada iti panangabuso.
Impaganetget ti SC a ti disiplina ket masapul a saan a naranggas, nalabes, wenno saan a maiyannatup iti child misbehavior.
No awan ti panggep a mangdangran iti dignidad ti ubing, mabalin nga adda ti dadduma pay a charges iti sidong ti Revised Penal Code imbes a child abuse.
Iti nabiit pay a kaso, immanamon ti Supreme court ti conviction ti lower court kontra iti maysa nga ama a nangabuso iti pisikal kadagiti putotna nga agtawen iti sangapulo ket dua a babai ken sangapulo a lalaki iti nagbaetan ti tawen 2017 ken 2018.
Dagiti inaramid ti ama, agraman ti panangikugtar, panangmalo iti wooden rod ken dustpan, ken verbal abuse ket maibilang a nalabes ken panaglabsing ti Republic Act No. 7610 wenno Special Protection of Children Against Abuse, Exploitation and Discrimination Act.
Saan nga inawat ti SC ti argumento ti ama a dagiti tignayna ket panang-disiplina na laeng kadagiti annakna.
Nakaawat ti ama iti uppat agingga iti innem a tawen a pannakaibalud, P45,000 a multa, ken nabilin nga agbayad iti P180,000 a danyos.
