Insingasing ti maysa nga agpampanday linteg a tutukan laengen iti panangpa-inget kadagiti makaallilaw ken peke nga advertisement imbes a parigaten dagiti lehitimo a negosyo.
Dayta iti singasing ni Sen. Bam Aquino iti plano ti Department Administrative Order iti Department of Trade and Industry (DTI) a mangobligar kadagiti negosyo a mangala pay laeng ti permit sakbay a makairruar ti advertisement ken sales promotions.
Segun ken ni Sen. Aquino, nayon a rigat ken gastos laeng ti gakat nangruna kadagiti babassit a negosyo ken online sellers nga agtultuloy a bumangbangon iti nangina a presyo iti langis ken dadduma pay nga operational costs.
Iti salinong ti gakat, kasapulan pay nga agipasa ti aplikasion dagiti negosyo agingga tallopulo a working days sakbay a makairruar ti digital ads, sponsored posts, videos, billboards ken dadduma pay a promotional materials.
Iti panawen a napaspas nga online marketing ken digital selling, saan a maikalintegan ti panaguray iti makabulan dagiti negosyante sakbayda a maka-promote iti produkto ken serbisyoda.
Impaganetget ni Aquino a posible nga agbabawi iti panagnegosyo iti sumagmamano nga MSMEs gapu iti nayon a requirements ken mabayadan a mapapati nga umabot iti P975 agingga nasurok P9,000 tunggal advertisement.
