Inlawlawag ni Mayor Germelina ‘Germie’ Goulart a dagus a natignayan wenno na-contain ti Municipal Agriculture Office iti ili ti Caoayan ti nairekordda a kaso ti rabies.
Dayta ket kalpasan ti panagpositibo iti rabies dagiti dua nga aso manipud iti Barangay Puro ken Barangay Tamurong.
Iti pannaki-uman ti Bombo Radyo Vigan ken ni Goulart, awan ti nasken a pagdanagan dagiti agindeg ta awan ti nairekord a casualty kadagiti tao, ta dagiti kaso ket kadagiti laeng aso a nagkinnagat.
Nupay kasta, nabalakadan dagiti agindeg a nakapulapol ti aso a mapanda latta agpabakuna uray saanda a nakagat para iti naan-anay a kinatalgedda.
Binalakadan ti mayor dagiti agindeg nga surotenda ti maipatpatungpal nga ordinansa nangruna iti panangigalutda iti asoda.
No madlawda nga adda sabsabali a tignay ti tarakenda ket ipakaammoda a dagus iti MAO tapno matignayan ken maliklikan ti panagraira ti makapatay a sakit.
