Imbasura ti Manila Regional Trial Court Branch 184 ti kaso kontra ti drag artist a ni Amdeus Fernando Pagente wenno Pura Luka Vega a naireklamo iti kontrobersyal a panag-performna a nangaramatanna iti kanta nga “Ama Namin”.
Iti pangngeddeng ni Presiding Judge Czarina Samonte-Villanueva, nakalanad a napaay ti prosecution a paneknekan nga adda nalabsing ni Pagente a tinulad ni Hesukritto ken sinalana ti kanta a maar-aramat iti misa.
Naireklamo ni Pagente babaen kadagiti opisyal ken miembro ti Hijos del Nazareno iti panaglabsing ti Article 201 ti Revised Penal Code nga adda pakainaigan ti Cybercrime Prevention Act.
Nakalanad iti ruling a saan a naipakkita nga adda saan a disente wenno immoral nga eksena ti drag artist kas iti panagbalin a sexual.
Impaganetget ti kampo ni Pura Luka a maysa nga art iti inaramidna ken gagemna a maipakita nu kasano a makilangen ni Hesus iti LGBT Community.
Aminado met ti korte a maibilang a panagbastos ken offensive ti nasao a banag isu a binalakanna a maaddaan iti pannakikammayet iti komunidad kangrunaan ita a panawen a nadaras a ma-access iti siasinoman iti social media.
