Mamati ti kampo ni Senador Jinggoy Estrada a nakapsut dagiti ebidensia a mangimameg kenkuana kadagiti maanomalya a flood control project.
Dayta ti imbaga ti legal counsel ni Estrada idi napan ti senador iti Department of Justice tapno personal nga ipasa ti counter affidavit-na.
Sumangsango ni Estrada iti reklamo a plunder gapu iti maanomalya a flood control project idiay Bulacan.
Segun ken ni Atty. Bianca Soriano, saan a makanay dagiti dokumento ken testimonia tapno agtuloy ti kaso gapu iti inconsistencies dagiti dadduma a testigo.
Kabayatanna, kinumpirmaran ti kampo ni Estrada a nangipilada iti mosyon iti Manila Regional Trial Court tapno maikkat ti Precautionary Hold Departure Order (PHDO) gapu iti mapapati nga awan a pagibasaran.
Sakbay dayta ket kiniddaw ti senador iti Sandiganbayan a mapalubosan a makaruar iti pagilian manipud Marso 30 agingga Abril 5 para iti personal a biahe.
