Kinontra ti abogado dagiti biktima ti war on drugs ti release plea ni dati a Presidente Rodrigo Duterte iti maikadua nga aldaw ti confirmation of charges hearing mainaig iti kaso a crimes against humanity.
Segun ken ni Atty. Paolina Massidda, mangibagi kadagiti rinibo a biktima, ti nasao nga anti-drug campaign ti naglabas nga administrasion ket saanna a gagem a parmeken ti iligal a droga no di ket panang-atake kadagiti marigrigat a komunidad.
Inlawlawag ni Massidda a ti panagaramat iti shabu kadagiti low-income a lugar ket masansan nga agserserbi a coping mechanism laeng dagiti agindeg gapu iti kinaawan dagiti mental health services, makanay nga edukasion, ken trabaho.
Inyunay-unayna nga iti baet ti laban kadagiti drug dealer, dagiti nangnangruna a vulnerable sector ti kagimungan ti maip-ipit iti riribuk ken maap-apektaran unay.
