Nagyaman ni Iloilo City Rep. Julienne “Jam” Baronda iti napaspas a tignay ti Department of Social Welfare and Development (DSWD) iti imbutaktakna babaen ti privilege speech iti session iti Kamara iti napasamak a modus iti sumagmamano nga opisyal ti barangay ti Assistance to Individuals in Crisis Situation (AICS) program iti lugarda.
Dinayaw ni Baronda ti insigida a panagipila ti DSWD ti kaso nga administratibo kadagiti karaman iti mapapati a pananglokloko ken panagabuso iti AICS program.
Maibasar ti impormasyon ni Baronda, kiskissayan dagiti korap nga opisyal ti P10,000 nga AICS benefit isu a P1,000 agingga P2,000 laeng iti maipapan kadagiti benepisyaryo.
Malaksid iti administratibo a dusa ket rumbeng a sumango pay dagiti suspek kadagiti kaso a kriminal kangrunaan iti utek iti nasao a modus.
