Pinasingkedan ti Juvenile and Welfare Council (JJWC) a saanda nga anamungan ti gakat nga ibaba ti minimum age iti criminal liability kasaruno iti pammaltog iti maysa a pagadalan idiay Tacloban City.
Segun ken ni JJWC Executive Director Tricia Clare Oco, saan a ti panagbaliw ti linteg iti kangrunaan a solusyon tapno malapdan ti kinaranggas a pakairamramanan dagiti menor de edad.
Kinuna ni Oco a no kayat a malapdan ti kinaranggas a macom-commit dagiti ubbing ket rumbeng a tutokan ti mangidurduron ti kinaranggas ket saan a ti linteg.
Rumbeng a tutokan iti aglawlaw dagiti ubbing, panangpadekkel ken ti pannaka-expose iti naranggas a content iti social media.
Innayonna nga imbes nga ibaba ti tawen ti criminal liability ket napatpateg a papigsaen ti rehabilitation, mental health services ken dagiti programa a makatulong iti panangliklik iti kinaranggas.
