Mangilatang ti Japan ti USD 187.82 million wenno nasurok-kumurang P11.53 billion a loan tapno suportaran ti pannakaipatungpal ti programa a Universal Health Care (UHC) iti Pilipinas.
Dayta ket kalpasan a pinirmaan ti Pilipinas ken Japan ti tulagan para ti Build Universal Health Care Program Subprogram 3-Emergency Support (BUHC3).
Segun ken ni Department of Foreign Affairs (DFA) Secretary Ma. Theresa Lazaro, patibkerenna dayta ti kari ti dua a pagilian a siguradoen ti dekalidad, nalaka ken patas a serbisio iti salun-at para iti amin a Pilipino.
Ti pondo ket maaramat tapno mapapigsa ti pondo ken panangidaulo ti UHC, pasayaaten ti panangipatulod ti health service ken paingeten ti health information systems ken accountability.
Maipatungpal ti proyekto babaen ti tulong ti Japan International Cooperation Agency (JICA) ken Asian Development Bank (ADB).
