Namakdaar ti Department of Foreign Affairs (DFA), babaen ti Philippine Embassy sadiay Tehran, kadagiti Pilipino a saanda nga umawat iti iligal a trabaho idiay Iran gapu ta iparitda ti panangipatrabaho kadagiti ganggannaet sadiay.
Insubli ti embahada idi Oktubre 15 ti maysa a Pilipina nga iligal a nagtrabaho kas household worker kalpasan a simrek iti Iran babaen ti tourist visa.
Impalagip ti embahada a dagiti Pilipino a manglabsing iti linteg ti panagtrabaho ti Iran, malaksid kadagiti ganggannaet nga espesialista ken teknikal nga eksperto nga addaan iti maitutop a work permit, ket mabalin a maipasango iti kriminal a kaso ken dusa.
Indagadag ti embahada iti publiko nga agannad kadagiti job offers idiay Iran, nangruna dagiti direkta a mangtangdan kadagiti trabahador nga agus-usar iti tourist wenno temporary visa, ta mabalin met a sungsungbatan dagiti recruitment agencies a nairaman kadagiti illegal work arrangements.
