Namnamaen ti Israeli government a mapaawidda ita a lawas dagiti sangapulo ket pito a Filipino officials a na-stranded iti Jewish state kagiddan ti panagpabanto iti Iran.
Segun ken ni Irit Savion Waidergorn a deputy head iti Israeli international aid agency a MASHAV, sangapulo ket pito iti nagkuna a kayatdan iti makaawid iti Pilipinas iti kabiitan a panawen.
Impasiguradona a natalged dagiti nasao a Pilipino ta maipapaay kadakuada iti accommodations, taraon ken amin a kasapulanda.
Kaaddoan kadagiti opisyal ket mayor a nagturong idiay Israel kas paset ti study tour iti MASHAV iti urban agriculture ken green cities.
Ti delegation ket kadua dagiti uppat pay a sabali a grupo iti local government officials ket manipod Latin America, Asia, ken Africa a rumbeng a makipaset koma iti Israeli trade show Muni Expo 2025 manipod June 17 agingga June 19.
Segun ken ni Waidergorn, naragsakda ken magagarada ta simmangpet dagiti delegates ngem nagbaliw iti sitwasyon, isu nga aramidenda iti amin tapno mapagtalinaedda a natalged ken makapanawda idiay Israel iti kabiitan a panawen.
Kinuna ti MASHAV executive a nu saanda laketdi a mapan ti bomb shelters ket agtultuloy ti grupo iti pannakipasetda iti study program ket ipapaayda iti lecture ken siguradoenda a saan a masayang iti oras iti baet iti mapaspasamak iti pagilianda.
Agtultulot met iti pannakisarita ti Israeli kadagiti Jordanian authorities ken Israeli traveling companies tapno kitaen nu makapanaw iti grupo via land nga agturong diay Jordan.
