Impaganetget ni Akbayan Partylist Rep. Dadah Kiram Ismula a kasapulan a nainget a maipatungpal kadagiti ride-hailing app vehicles ti Safe Spaces Act kalpasan ti naipadamag a harassment ti maysa a ride-hailing driver iti aktres a ni Xyriel Manabat.
Segun ken ni Ismula, ti nasao a pasamak ket pammaneknek a nasken a maipasa nga insigida ti House Bill 768 wenno ti Expanded Safe Spaces Act nga impilana idi July 2025 kadua da Rep. Perci Cendaña, Chel Diokno, ken Kaka Bag-ao.
Gagem ti addang a lumawa ti sakup ti linteg tapno mairaman dagiti pribado a lugan iti salinong ti app-based transport network services.
Innayon ti kongresista a ti kapadasan ti aktres ket posible a mapaspasamak pay iti adu a babai ken ubbing, saan laeng nga agva-viral isu a napateg a manayonan ti proteksion ti linteg tapno agbalin a natalged ti amin, uray iti uneg dagiti lugan.
