Binabalaw ni President Ferdinand Marcos Jr. iti ingingina ti presyo ti karne iti baboy kadagiti tiendaan nga umab-abot iti P380 agingga P400 kada kilo.
Dayta iti pinasingkedan ni Agriculture Secretary Francisco Tiu Laurel kalpasan a nakitaripnong ni President Marcos mainaig iti kasasaad dagiti suplay ken presyo dagiti taraon iti tiendaan wenno food security situation.
Segun ken ni Laurel, agtakada nu apay a ngimmina iti presyo ti karne nupay ti farm gate price iti baboy ket P240 agingga P250 laeng.
Gapu dayta ket imimbestigaran iti Department of Agriculture iti insidente ken komunsultadanto kadagiti producer tapno maamwan nu mano iti rumbeng a presyona.
Apaman a mapaneknekan nga adda profiteering wenno panangundaway ket dusaenda dagiti adda iti likodan dayta ken mangipatungpalda iti maximum suggested retail price iti karne ti baboy.
Target iti gobierno a leppasen ti imbestigasyon iti ingingina ti presyo ti karne iti baboy iti sumaruno a dua a lawas wenno panagtapos iti Pebrero.
