VIGAN CITY – Pinasingkedan ni P/Capt. Pol Arreola iti Galimuyod PNP a saanda nga agpatingga a mangduktal iti pudno a rason iti napasamak a pammaltog idiay Brgy. Nagsingcaoan, Galimuyod.
Iti pannaki-uman ti Bombo Radyo Vigan ken ni Arreola, simmuko idiay Banayoyo PNP ni Gilbert Nanag, agtawen iti tallopulo ket siam nga agnaed idiay Brgy. Legaspi, Galimuyod ket inaminna nga adda iti napapatayna nga isu ni Anita Angel Fernando, balo, agtawen iti tallopulo ket walo nga agnaed idiay Ayusan, Sta. Lucia.
Segun ken ni Arreola, saanda pay laeng a nabigbig nu ania a paltog iti naaramat iti krimen ta manarimaan pay laeng iti panag-imbestigarda.
Ti panagsaludsodda kadagiti kakabagyan ti biktima ket mapapati nga imon iti rason iti pammapatay ngem imimbestigaranda iti pudno a pasamak.
Kabayatanna, pinasingkedan ti kabsat ti biktima a ni Gaudie Cabatic a natalna ti suspek nu bumisbisita iti pagtaenganda isu a saanna a ninamnama a papatayenna ti kabsatda.
Innayonna pay a manipod nagatang ti suspek iti paltog ket namin-uppat a daras a pinaturonganna nu isisuda iti pagtaenganda ket pinangpangtaanna a patayenna nu saan nga agpakamatay kas pinasingkedan ti biktima idi kallabes.
