Naka-Red Alert Status iti probinsia nga Ilocos Sur kagiddan ti panagduprak ti Bagyo Uwan.
Iti pannaki-uman ti Bombo Radyo Vigan ken ni Rhon Arquelada a Provincial Disaster Risk Reduction and Management Office (PDRRMO) Officer, in-activate dan Operations Center iti probinsia para iti iduduprak iti bagyo.
Segun ken ni Arquelada, napalaus iti panagalerto ken panagsaganada kadua dagiti maseknan nga ahensya iti gobierno tapno maipaay iti rumbeng a tignay para kadagiti umili tapno maliklikan iti aniaman a posible a mapasamak.
Balakadna a maaddaan ti pre-emptive evacuations kadagiti lugar a hig-risk nangruna dagiti flood-prone areas, low-lying areas, landslide-prone areas, ken storm-surge areas itatta a saan pay a dimmuprak ti bagyo.
Kadagiti agbakwit manipod kadagiti pagtaenganda ket balakadna nga itugot dagiti taraken wenno sakbay pay iti bagyo ket ipanen kadagiti natalged a lugar tapno saan nga agparikot nu sumangbay ti bagyo.
Kinunana a tunggal pamilia kadagiti pagtaengan ket masapul nga agsagana ket aniaman a mabalin nga ubraen ket agtignayen tapno masigurado a natalged iti balbalay ta sigurado iti napigsa nga angin a sumangbay.
Nakasaganan dagiti rescue vehicles iti Provincial Farmers Livelihood and Development Center nu kas bilang kasapulan a maideploy ken uray dagiti rescue teams ket nakasaganan nu kas bilang adda dagiti agkasapulan iti tulongda.
Manamnama a mangitunda ti Bagyo Uwan iti napigsa nga angina ken tudo inton rabii agingga inton parbangon iti Lunes ta isu iti panagdalyasat ti bagyo iti probinsia.
